MERE KHWABON KI PARI

Kal raat mere khwabon mein aayi ek pari,

Woh mujhse kehne lagi,

Pass toh aao zara,

Yun na raho mujhse khafa,

Kab tak tadpaoge tum mujhe,

Aansoon bahaoon main kab tak?

Aag lagi hai mere dil mein, lekin jal rahe ho tum,

Phir bhi kyu nahi pighalte ho tum?

Kal raat mere khwabon mein aayi ek pari,

Woh mujhse kehne lagi,

Naraazgi jaayez hai tumhari,

Maante hai galti hamari,

Par yun na bhula do tum mujhko,

Gussa karo na itna ki bhool jao tum khudko.

Kal raat mere khwabon mein aayi ek pari,

Woh mujhse kehne lagi,

Zara pass toh aao,

Yeh dooriyan ab mitaon,

Dil mera kabse tanha akela hai,

Juda rehkar hua kiska bhala hai?

Aaj subah jab meri aankh khuli,

Phir nikal pada main usi gali,

Jahaan rehti hai meri khwabon ki pari…

Jaa baitha uske ghar ke saamne,

Do gaz zameen ka tukda hai bas jo,

Pukara maine use jhukate hue apne sir ko,

Pee lenge tere aansoon uth jaaye jo tu,

Pee liya maine apna gussa, nahi ab koi shikayat,

Intezar karenge tera, yeh sun le tu,

Jab tak aaye na qayamat.

Jaakar door kitna hota mera jaana,

Har raat toh hai tere hi pass aana…